Á aðalfundi Hrossaræktarsambands Vesturlands, HrossVest, þann 10. maí s.l., var tekið fyrir erindi Hestamannafélagsins Glaðs þar sem Glaður óskar eftir að gerast aðili að HrossVest. Erindið var samþykkt og félagið er því orðið deild í sambandinu.
Þetta þýðir að félagsmenn í Glað eiga nú aðgang að stóðhestum á vegum HrossVest með sama forgangi og á sömu kjörum og aðrir aðilar að HrossVest. Einnig koma nú Glaðsfélagar til greina með ræktunarhross sín þegar úthlutað er viðukenningum hjá Hrossvest fyrir kynbótahross og hrossræktarbú.
Nánari upplýsingar um Hrossaræktarsamband Vesturlands og starfsemi þess eru á vef sambandsins, hrossvest.is.
Opna íþróttamót Snæfellings verður haldið í Grundarfirði laugardaginn 12. maí næstkomandi. Mótið hefst kl. 10:00. Nánari upplýsingar hér.
Skuggi heldur opið íþróttamót í Borgarnesi laugardaginn 12. maí næstkomandi og hefst mótið kl. 10:00. Nánari upplýsingar hér.
Niðurstöður íþróttamótsins 1. maí eru komnar inn á mótasíðuna, beðist er velvirðingar á að þetta dróst í nokkra daga.
Sigurvegarar í stigakeppni vetrarins fengu sín verðlaun á mótinu. Í barnaflokki voru þau jöfn í efsta sæti Einar Hólm Friðjónsson, Íris Dröfn Brynjólfsdóttir og Lydía Nína Bogadóttir með 18 stig. Þau hlutu hvert fyrir sig 5.000 króna gjafabréf í Knapanum, gefið af Hrossaræktarsambandi Dalamanna. Unglingaflokkinn vann Þóranna Hlíf Gilbertsdóttir með 30 stig og hlaut hún 10.000 króna gjafabréf í Knapanum, gefið af versluninni. Ágústa Rut Haraldsdóttir vann ungmennaflokkinn með 20 stig og hlaut 10.000 króna gjafabréf í Cintamani, gefið af versluninni. Efstur í opnum flokki var Valberg Sigfússon með 60 stig og Hrossaræktarsamband Dalamanna gaf honum 30.000 krónur upp í folatoll hjá sambandinu.
Liðakeppnina vann sveitin með miklum yfirburðum, hlaut 361 stig en Búðardalur hlaut 161 stig.
Erum með til sölu soft shell jakka (peysur) frá Knapanum í Borgarnesi, sem hægt er að máta og panta. Jakkarnir verða merktir með Glaðslógói á bakinu, Knapalógói í barminum og einnig getur fólk sett nafnið sitt undir Knapalógóið. Öll merking er frí en jakkarnir kosta 12.990 og 14.990 (tvær týpur í boði). Barnajakkarnir eru ekki komnir í hús en þeir verða auglýstir fljótlega og þá veður líka boðið upp á mátun og verða þeir eitthvað ódýrari.
Hvetjum alla Glaðsfélaga og áhangendur til að fá sér Glaðsjakka. Endilega hafið samband strax í dag, þar sem við erum að safna í eina stóra pöntun til að tryggja lægsta verð á merkingunni. Nánari upplýsingar hjá Svölu s: 861 4466 eða Gyðu s: 696 7169
Það hafa verið gerðar smávægilegar breytingar á dagskrá mótsins á morgun eftir að fjöldi skráninga í hvern flokk varð ljós. Ákveðið hefur verið að sameina úrslit í fjórgangi yngri flokka. Það verða sem sagt sameiginleg úrslit í barna-, unglinga- og ungmennflokkum fjórgangs.
Dagskráin er þá svona:
Forkeppni
Fjórgangur: Opinn flokkur, barna- og unglingaflokkur og ungmennaflokkur
Fimmgangur: Opinn flokkur
Tölt: Barna-, unglinga-, ungmenna- og opinn flokkur
Úrslit
Fjórgangur: opinn flokkur og yngriflokkar (barna-, unglinga- og ungmennafl.)
Fimmgangur: opinn flokkur
Tölt: barna-, unglinga-, ungmenna- og opinn flokkur
100 m skeið: opinn flokkur
Nokkrar afskráningar hafa borist og vegna þeirra erum við nú hætt við að tvískipta forkeppni í fjórgangi ungmennaflokks eins og búið var að birta í rásröðum. Búið er að leiðrétta rásraðirnar sem birtar eru hér neðar með hliðsjón af þessu. Athugið að rásraðir og hollaröðun hafa lítillega breyst frá fyrstu birtingu.