Af leið 2 er farið fram Hörðudal annað hvort að Hóli og Seljalandi eða inn að Tungu. Frá Tungu eða Seljalandi er riðið fram Laugardal, yfir Sópandaskarð og suður Langavatnsdal. Þegar komið er rétt norðan við Langavatn er um tvær leiðir að ræða.

Hægt er að fara austan megin niður með vatninu, að leitarkofa Borghreppinga að Torfhvalastöðum og svo áfram veg suður að Svignaskarði í Stafholtstungum. Frá Seljalandi í Svignaskarð eru 41 km og þar af 25,5 km í Torfhvalastaði.

Hinn möguleikinn er að fara vestan megin við Langavatn og er þá farin vegslóði yfir Langavatnsmúla og komið að leitarkofa Álfthreppinga við Sandvatn. Þaðan eru svo nokkrir möguleikar eftir því hvert stefnt er. Úr Seljalandi í Álfthreppingakofa eru 31 km. Yfirleitt gista ferðamenn í öðrum leitarkofanum eftir því hvor leiðin er farin og er gisting pöntuð á skrifstofu Borgarbyggðar.

GPS ferill: Austan Langavatns og yfir Sópandaskarð. Hér var ekki riðinn vegurinn frá Svignaskarði Torfhvalastaði heldur farið frá Jafnaskarði inn Grímsdal og þaðan svokallaða Rangala yfir að Beilárvöllum skammt frá Torfhvalastöðum.

GPS ferill: Yfir Langavatnsmúla (þ.e. vestan Langavatns) og Sópandaskarð. Hér var farið frá Munaðarnesi í Álfthreppingakofa. Úr Laugardal var farið á eyrum Hörðudalsár að Hóli og svo vegur í Blönduhlíð.

Bláar leiðir eru aðalleiðir, rauðar leiðir aukaleiðir og grænar þar sem ríða þarf á akvegi. Heil lína er teiknuð nákvæmlega, yfirleitt eftir GPS ferli en rofin lína er ekki nákvæm. Kort birt með leyfi frá Garmin á Ísklandi, Samsýn og Landmælingum Íslands.